अरज इन्द्रबाई सूं आखां जी !

अरज इन्द्रबाई सूं आखां जी !
सूरज सोवीसां साखा जी !! टेर !!

के कमला के कामही,
सैणी के सुरराय !
भाग हमारे भगवती,
औरु प्रगटी आय !!1!!

नागणेच कै नीपज्या,
नो दुरगा थे न्याय !
बूंट किधू तूं बैचरा,
जोगण के जमवाय !!2!!

देवल आया दूसरा,
भोम उतारण भार !
कै थे लीनूं कर कृपा,
आवड़ जी अवतार !!3!!

गढ गोखां गिरनार सूं,
आया करण उबेल !
भलो रचायो भगवती,
खुड़द नगर बिच खेल !!4!!

आया छा थे आगरै,
कमधज पीथळ काज !
राजां की राजल रखी,
लोवड़वाळी लाज !!5!!

सेखो भाटी सिन्ध में,
कियो कैद किलमाण !
लागी जेजन लावतां,
बंणिया चील बिवाण !!6!!

सुरभी घेरी सांखले,
कांनी लोपी कार !
सज हाथळ महासदू,
बाघ थई तिण बार !!7!!

बै ब्रद मतना बीसरो,
देख कळू रा दौर !
अनदाता अब आसरों,
आप बिना नह और !!8!!

सुण हेला सागर-सदू,
आणी है तो आव !
त्यारै छै तो त्यार दे,
पड़ी भंवर बिच नाव !!9!!

गादड़ डोलै गाँव में,
सोवै न दिन में सेर !
याद कर्यों नहिं आवस्यो,
सरकै दिखण सुमेर !!10!!

ऊगे रवि आंथूंण मैं,
आभ पड़े घर आय !
धर पांणी भेळी धसै,
सक्त न करो सहाय !!11!!

हलवद में भैरव हुवै,
करता हद कैतूळ !
बेगा आज्यो बीसहथ,
सझ वाहन सादूळ !!12!!

कहणी छी सो कह लिई,
महिप न मानें मूऴ !
समजाद्यौ सागर-सदू,
झाझा सिंह लग झूल !!13!!

सुंभ-निसुंभा सोखणी,
घालत असुरां घात !
डरपी कांई डोकरी,
मुलक जांण मेवात !!14!!

बूढापा री बीनती,
म्हारी तो सूं मात !
समळादी सारी सरम,
अब धारै ही हाथ !!15!!

थिरू गांव मो थूंसड़ो,
जाहर नांव जुहार !
रहणूं अलवर राज में
आप तणो आधार !!16!!